Najqlo' waj lchink'ole'ku'n ttz'o'tz taq'un xmaye'n xaw, najqlo' waj lchinxmayine'n tkyä'j taq'un chixmaye'n tx'uml ntin na i'qlo' jun tx'umla'tz yi nimte'n najtxequn, i'qlo' juna'tz yi iẍnin najtxequne't tk'u'laq bixe'sqil, yi juna'tz yi najkyal q'aky'e'x #Xqisum tetz.
Ya'tzninqlo' najwajtz, nqa ba'npe' ltz'ul sqil waq'un taq'un joyle'n na't atitkyent yi jun q'uj tx'uml yi najalchij "ch'ok" tetz, kyi'kunbatz nojoponq inwutz të'j nqa kyi'pe' nqa i'pe' ayubel ẍchaje'tib tzinwutz. Kyi'k tzban, ba'nnin junta'tz, na nimte'n tzatzi'n tztaq'e' tzwetz.
¡o! jë'j at tzinë'j, chinchlo' tzbane' yi lnojopon inwutz të'j jun tx'umla'tz yi nimte'n txequn. Yi jun tx'umla'tz yi kyi najiky' inpaj taq'un xmaye'n, yi jun tx'umla'tz yi najjalsan bis tzwetz qo kyi najjalnin waq'un ẍchixo'l e' tuch'.
¿Lo'qtzun jun tx'umla'tz yi najalchij #xqisum tetz? ¿Lo'qtzun jun tx'umla'tz yi wi'nin paq'puchal, lo'qtzun i' na txant ta'n inkyime'n tq'ab bis ta'ntu' kyi najjalnin waq'un, nojkyentz të'j yi at mu'ẍ sbaq' xe kyä'j?
Kyi'k tzban, qo ltz'opon niky'al aq'bal waq'un taq'un ẍch'iwe'n yi ljatxtib sbaq', kyi'k tzban qo ltz'ul sqil waq'un ta'n wilol wutz, yi jun tx'umla'tz yi xqisum najbi'aj. Yi juna'tz yi najwal #saqtx'uml tetz.
Txumultetz: Pontzajtnin lqil.
MRV
Comentários