¡o! i najwilnin jun chin ju’wtza’tz ninin najben intxumu’n joylaj, jaltnin najinnach yi iku’n wuch’ kyeq’eq’ yi najxumkan xo’laq tzaj, iku’nin wuch’ a’ yi najojqel xo’laq k’ub.
Ibin jun chin ju’wtza’tz najkẍu’lsan tx’aqx tink’u’l kyaqilnin tir yi najniky’aqku’ntz anaqa’jil. Ibin jun chin ju’wtza’tz najna’wsantzaj tzwetz yi chin abalajil, yi chin ayubel, yi chin axmayin.
Ëj, atinkyenq tetz jun ju’wtza’tz chinch najbantz ta’n wate’n anaqa’jil, ntin na kyi’ninlo’ na atbin jun chin siwun tzqaxo’l tzawuch, yi jatxolqetz ëj, jaltnintzun chuna’n najinbantz, na kyi’ninlo’a’tz.
Ẍe’ntzun lniky’tzajtz wu siwun jalu’, na ibin wajbil y che’nq lchinje’ul wutz kok aka’l ta’n tilwe’n xtxequnil axmayin ejnin ta’n talche’n kabox yol tzatz yi natijin tzwetz.
Ẍe’ntzun ltzinban jalu’, qo banpe’ lno’k tetz jun ch’ök, che’nqlo’ lchinbitzintzaj tibaj jun wi’ xq’us, nqa ba’npe’ tibaj jun wi’ binsi’ qo ba’npe’ tibaj jun wi’ oj ta’n abitol in.
Najno’k ta’n xtxumle’n qo ba’npe’ ewun lchinje’ul xo’l tqan ko’n, kyi’kuninqlo’ ltz’iky’ tzatz yi lnopon tzaxlaj, ntin na ẍchisak’paqlo’ käb mam qol waq’un, yi najchixontz naqa’j.
Qo ba’npe’ che’n lchinbitzintzaj xo’l jun piẍ ko’n yi at jalajtken siwun, i atinkenq tetz jun choch’, cha’tztzun lchinabitnintz.
Kyi'bin tzawaq’ ky’ixk’uj tzwetz, kyi'bin tzawaq’ bis, na i aẍa’tz yi najpeq’nin walma’ të’j.
Ëj, kyi’nin najjal be’ waq’un të’j, nqa ba’npe’ che’n lchintziwuntzajtz xe käb wi’ tapa’l yi ate’ tzibe’, qo ba’npe’ che’n lqach’iwqibtz, Kuken kyi najpujxij waq’un.
ẍe’n ltzinban jalu’, at jun ju’wtz tzqaxo’l at jun siwun yi wi’nin xo’bilil, jajch’uy te’j a’, najmujan wutz kyä’j, ejnin qo lniky’tzajtz tibaj, junku’n yol yi alo’ inwutz tzbane’ yi lchinteqlen a’.
04 de julio 2018
MRV
Comments